Informamos da publicación en liña das conferencias correspondentes ás XVII, XVIII e XIX edicións dos Encontros Arqueolóxicos do Barbanza, que xa poden ser consultadas a través da canle de YouTube do Centro Arqueolóxico do Barbanza.

Esta iniciativa permite achegar á cidadanía, ás persoas investigadoras, ao alumnado e a todas aquelas persoas interesadas no patrimonio arqueolóxico os coñecementos, estudos e investigacións compartidos ao longo das últimas edicións destas xornadas, facilitando o acceso a uns contidos que forman parte da actividade de divulgación arqueolóxica desenvolvida no Barbanza.

A edición dos vídeos e a súa posterior posta a disposición da cidadanía foi posible grazas á subvención concedida pola Consellería de Cultura, Lingua e Xuventude, ao abeiro das axudas destinadas a centros museísticos da Comunidade Autónoma de Galicia para o ano 2026 (código de procedemento CT110C).

O Concello de Boiro solicitou esta axuda coa finalidade de contribuír á edición, conservación e difusión das conferencias dos Encontros Arqueolóxicos do Barbanza, favorecendo que os contidos e coñecementos expostos polos diferentes relatores e relatoras poidan chegar a un público máis amplo e permanecer accesibles para a súa consulta.

Deste xeito, os Encontros Arqueolóxicos do Barbanza amplían o seu alcance máis alá das xornadas presenciais, permitindo que as súas conferencias poidan ser consultadas desde calquera lugar e en calquera momento, contribuíndo á divulgación do patrimonio arqueolóxico e ao coñecemento da investigación desenvolvida no territorio.

Nota: Na canle só están publicadas aquelas conferencias cuxos relatores e relatoras autorizaron expresamente a súa difusión.